Mar 4 | BEF | STEP | To mone yupahi hiti Yesu Galili nagami beletoga buto nohuto kaga lu noepito'a to babu bona'i aitoga li gehesa nehago ai boti nagamilugu ni'igo buto tito anagu mino'ehibe.

Mark 4

Nose'na bigaha'a he kofose'namofihi ka'a

Mt 13:1-9; Lk 8:4-8

1 To mone yupahi hiti Yesu Galili nagami beletoga buto nohuto kaga lu noepito'a to babu bona'i aitoga li gehesa nehago ai boti nagamilugu ni'igo buto tito anagu mino'ehibe. 2 To asaga bona'magi nagami beletoga meto minete kehelite mine'ahabe. Ya hago ai fono kalugu asaga kaga lu noepito ma luto lu epi'ehina: 3 Kehelilo. Bo moneuba nose'na bigaha'a tili huto kafalube luto bu'ehina. 4 To tili hu nohe'migo bigaha'a mone kegi'a soto limi'ehigo namamagi ete fine pine hite ne su he'ahana yabe. 5 To mone kegi'a me balafaga limito to me'a nesi'asi ni'igo mele'isi ti'ehibe. 6 Tiloto yalo lufusa'a meni'igo, to yege tito lolago, mele'isi lo hosopa ito lo i pigi'ehina yabe. 7 To mone kegi'a foya kifigu limi'ehina'a foya kifiuba tito noi etago, legeya meho'ehina yabe. 8 To mone kegi'a hetofa melugu limi'ehina'auba meluguti fifaya nolito tito legeya ho'ehina yabe. Mone 30 hoto mone 60 hoto to mone 100 hoto legeya ho'ehina yabe. 9 Ya hu'ehina fono ka yabe. Lenegekesatini ni'ina bona'i ka keheli fe lilo.

Fono ka babu luto lu'ehina'mu henabe lutobe?

Mt 13:10-17; Lk 8:9-10

10 Yesu ya lulago alihi bona'magi bi su helago ai'a pana'alobo 12 magi, to anaga minana bona'magi fono kamofihi hapa'amu'i loka he'ahabe. 11 To ai ma luto lu epi'ehina: Lenali Hu'mamofihi kapo'amu'i suguna ka hekele lite kehelilabe. To enali fegutoga bona'magihi fono ka anasi lu noepube. Hena'mube?

12

Enali bu geba bu geba nehite
bu megalabe.
To keheliba keheliba nehite
mekehelilabe.
Enali kehelitita
komopa'ani i gelehe hinogo
Hu'mau foipana'ani li he'mitita'mu yabe.

To enali mekehelilabe luto fono kalugu lu noepube, Yesu ya lu'ehina yabe.

Bigaha'a kofo'ehinamofihi hapa'a lu hokolo hu'ehina

Mt 13:18-23; Lk 8:11-15

13 To Yesu ma luto lu epi'ehina: Lenali ya'ma fono kamofihi hapa'a mekeheli'ahafiye? Ana, asaga fono ka hiya hite kehelilabe? Hapa'a ya'ma yabe. 14 Nose'na tili hu'ehina bouba ai Hu'mamofihi kaga tili hu nohe'mibe. 15 To tili hu nohe'migo soto limi'ehina'a ya'ma ma hise bona'mo nehabe. Enali kaga kehelilago ana'asi Satau oto komopa'aniguti kagamo enebe nosilibe. 16 To me balafaga limi'ehina'a ya'ma ma hise bona'i nehabe. Enali kaga kehelite ana'asi enegelo bite kagamo komopa'anigu li melete hupamone kanagu ya hite minete yalo aku'i bona'magi ana kagamomu'i fi taga nehi epelete to enegene mane inogo, enali kaga mele'isi nehe'mibe. Lufusa'ani meni'igo mele'isi nehe'mibe. 18 To foya kifigu limi'ehina'a ya'ma ma hise bona'i nehabe. 19 Enali kaga kehelilete'ani aku'i nasana'animu'i enegekesa keheli keheli hite minete to efaha'animu'i enofokehi lite minete to fato fato'namu'i laga epesinogo minete'ani kaga nehe'mibe. Ya'ma luna lanauba kagamo noi etago komopa'anigu legeya menohabe. 20 To hetofa melugu limi'ehina'a ya'ma ma hise bona'i nehabe. Enali kagamo kehelite komopa'anigu li nemalabe. Ya nehago kagauba komopa'anigu tito legeya nohabe. Mone 30 hoto, mone 60 hoto, to mone 100 hoto nohabe. Ya'ma fono kamofihi hapa'a ya ni'ibe. Yesu ya luto lu epi'ehina yabe.

Libi'mo fala ki eto'ehina ka'a

Lk 8:16-18

21 To ka mone hiti ma luto lu epi'ehina: Bona'magi libi'mo li gite'ani somomotu ifi netafi sipa kapogu fala nekifi hitalo nemalabe? Hitalo nemalana yabe. 22 To Hu'mau ana huto yatai fala ki'ehinana asaga'i alihi le'mo huto hilibe. To suguna'asi ifi to'ehina'a alihi lu hokolo hilibe. 23 Lenegekesa nina bona'i ka kehelilo.

24 To ma ka hiti lu epi'ehina: Lenali nekehelina kagamomu'i kaba hite minalo. Hu'mau ka kehelilata bomofitoga kaga hapa'a mone hiti lu emilibe. To kaga mekehelilata bomofitoga mone nesi'asi keheli'ehina kagamofihi hapa'a aku'i fala ki etalibe. Hu'mau ya huto lenali aitoga hi emilata supo huto aku'i babu luto hu epalalibe.

Bigaha'auba ti'ehinamofihi fono ka yabe

26 To Yesu ma kaga lu epi'ehina: Hu'mamofihi kapo'a legi huto ma ni'ibe. Bo moneuba nose'na bigaha'a foyagu tili hu he'miloto, 27 yalo buto folugu'i bu'i kola etehi ho tila huto minoto'a nose'na boloto ti'ehina. 28 To hiya huto notina ana bouba menokehelibe. Ai'a meluguti notina yabe. Kapa'a yata'a fifaya nolito tiloto gelemu'a hu mololoto yalo legeya'a hu nomalabe. 29 To ana legeya'a hosa lolenogo ana bouba tagaluna kana'a leba notabe luto buto notagabe.

Kitili ketele bigaha'a ti'ehinamofihi fono ka'a

Mt 13:31-32; Lk 13:18-19

30 To Yesu ma luto lu epi'ehina: Hu'mamofihi kapo'a hena legita ni'ibe? Lali hena fono ka luloto hapa'amofihi lu hokolo hilune? 31 Ya'ma legita ni'ibe. Nose'na mone'mofihi bigaha'a kitili ketele'asi ni'inagi aku'i melugu kofolenogo tito asaga nose'na bege ligito sipina huto tito yaha'a ha'i fito ni'inogomo namamagi samapa'agu noha'ani negibe. Hu'mamofihi kapo'a ana nose'na legi huto hofa notabe.

33 To Yesu fato fato fono ka ana huto lu epi'ehibe. To enali boana'magi mone kehelilago mone hiti lu epila huto mino'ehibe. Yege yege kagamo fono kalugu lu epi'ehina yabe. 34 To asaga bona'i nehago fono kagutiko anasi kaga lu epi'ehina, to alihi bi su helago ai'a pana'alobo'a enaligo nehago ai ya'ma kaga hapa'a asaga'na lu hokolo hu epolo'ehina yabe.

Sipi nagamiuba biligo Yesu le'mo fulu hu'ehina

Mt 8:23-27; Lk 8:22-25

35 To, ana yupahi utehi lulago Yesu pana'alobomagihi ma luto lu epi'ehina: Nagami muya beletoga bilune. 36 Ya luto ligo enali asaga boana'i he'mi epelete ai hiti botigu tite bi'ahabe. To fato fato boti hiti hetegete bi'ahabe. 37 Ya hite nebago sipi abafahuba lito nagami'i bilito'a i gala fuka ito botigu tigo bai talube'mu hu'ehina yabe. 38 To ya nohigo, Yesu boti si'agu nebelusalo bu'i nokago, enali le'mo ho tite ma lu emi'ahana: Oho. Babafio, lali afililune'mu nohutaya kai fa'mene minalapiye? 39 Ya lago Yesu ho tito'a abafahi ka emekito'a to nagami'mofihi: Lege nobo. Legeso hubo, luto lu emigo abafahuba lege noto to nagami'uba legeso huto fulu hu'ehina yabe. 40 To yalo Yesu ma luto lu epi'ehina: Lenali henabe lite koli hi'ahabe? Nani kaba hu lepalaluna ni'inaya mekeheli'ahafiye? Nanitoga lenemehi menimise keheli ule'ale mehi'ahanafiye? 41 To ya ligo, enali enelesa'ani gofa noligo ai lu emigo ai lu emigo hite ma li'ahabe: Akae. Ya'ma bo kiyi'afu nohibe? Ai abafapomu'i nagami'momu'i kaga noligo ka keheli emi'aha'ibe. Enali ya lite topa he'ahana yabe.